Foto: pixabay.de

Verpuußen

düt und dat ob platt

Du lehrst so allerhand, wenn du up de Eer büst: Dat fangt all as ganz lüttschet Kind an, geiht in‘ Kinnergoorn, in de Grundschaul un ok dorna in de Schaul jümmer wieder. Dien Brägen is as so’n Swamm, de allens upsucht, vör allen in de Kinnertiet. Na de Schaul maakst du denn diene Utbillung, suust in de Weltgeschicht rüm oder studeerst, un warst mit de Tiet jümmer klauker. Am Enn weeßt du allerhand, kannst fief Spraken schnacken, kannst allens uträken, kennst di ut in Geschichte, Physik un Chemie un kannst de Hauptstädte von de ganze Eer uptellen.

In dien Läben lehrst du aber meist ok, dat du „funkschoneeren“ un wat leisten musst, wenn du hier in düsse „zivilisierte“ Welt kloorkamen wutt. Du musst di affstrampeln, wat schaffen un wat vörwiesen, musst dörchholn un twischendörch ok mal de Luft anholn. Du lehrst, dat du in swore Tie’n de Tähn tauhopen bieten musst, dat du di tauhopenrieten schasst un „dor dörch musst“, ok wenn dat mal nich wiedergeiht oder eng ward. Blooß nix anmarken laten, wenn di dat mal slecht geiht oder du nich mehr kannst. Oftmals wütt se di sogor wiesmaken, dat dat an eenfachsten is, wenn du dienen Arger nicht rutlässt, sonnern em rünnerslukst (ok wenn di wat ganz un gor nich „smeckt“)! Bäter schall dat wään, wenn du di „een dicket Fell“ tautaulechst, heet dat. Ob dat in annere Länner ok so ne Schnäcke gifft von wägen Dörchholn un „de Tähn tauhopen bieten“? Oder is dat typisch düütsch?? Wi Düütschen sünd jo öberall bekannt dorför, dat wi vääl Wert up Leistung lecht un wat schaffen wütt…

Wat du hier bi us aber oftmals nich lehrst, dat is dat Verpuußen twischendörch. Dor können wi amenn noch wat lehrn von annere Länner: Dat Luft haln un tau Rauh kamen. Sick ok mal hängen laten, dörchatmen un dat, wat du schafft hesst in dien Läben, eenfach mal bekieken, di doröber freien un dormit taufrern wään. Mal 5 grade wään laten, dumm‘ Tüüch schnacken un di scheckig lachen öber irgendeenen Tüünkraam. Eenfach mal in de Sünn sitten, de Seel bummeln laten un di freien öber de Sünnstrahlen, de up di daal schient un di warmt. Oder in‘ Gras lingen un de Wulken bekieken un vörbi teihn laten. Vör allen musst du rutfinnen, up wecke Oort un Wies du süms an besten affschalten kannst: För de eenen is dat dat Beste, wenn se mal gor nix maakt, de annern bewäächt sick leeber oder hackt sogor stünnenlang Holt, üm sick afftaureagiern.

Hier bi us up’n Lann kannst du nu in Sommer jedenfalls so allerhand maken, bi dat du up annere Gedanken kummst, trotz Corona: Du kannst mit dien Rad dörch dat Aller-Leine-Tal, de Vogelpark-Region oder de Heid pedden. Du kannst tau Faut ünnerwägens wään, Vagels bekieken un up eene Wisch een Picknick maken. Eenen Tee oder Kaffee, een Glas Wien oder een Beier tau Huus oder in‘ Café drinken, mit dien Rennrad oder Moped dörch denn Heidekreis suusen, buten in‘ Gras danzen, up’n Water paddeln, angeln oder Yoga in Goorn maken. Wenn dat so önnich heit is, denn kannst du di sogor in eenen See affkeuhlen. Un wenn du mal wat Frisches äten wutt, denn plückst du eenfach süms eenen Namiddag lang Bickbeern för tau Huus. Dat smeckt so önnich na Sommer!

Denn ick glööv, dat is wichtig, dat du twischendörch mal loslässt! Denn kannst du dorna ok wedder önnich taufaten un wat in‘ Angriff nähmen. Aff un an eenfach mal ne Paus maken, een bäten „dörchhängen“ un Swung haln för wat Neies …

 

Gudrun Fischer-Santelmann

Anzeige

Gudrun Fischer-Santelmann

Genau hinschauen: Autorin Gudrun Fischer-Santelmann nutzt diese Gabe, um Alltagssituationen und besondere Augenblicke aufzugreifen und sie mit Witz, Ironie und einem Augenzwinkern zu beschreiben.

Schreibe einen Kommentar

Deine E-Mail-Adresse wird nicht veröffentlicht.

Bitte füllen Sie dieses Feld aus
Bitte füllen Sie dieses Feld aus
Bitte gib eine gültige E-Mail-Adresse ein.

Menü