Wiehnachsidyll

düt und dat ob platt Foto: Gudrun Fischer-Santelmann

Wiehnachen steiht vör de Döör un wi freit us up ruhige Daach bi us tau Huus, mit alle Kinner un mit Wiehnachsboom up uuse Dääl. Mal kieken, wo dat düt Johr nu allens mit „Corona“ ward, de us gewiss bi vääle Saaken eenen Strich dörch de Räknung maakt. Ob wi öberhaupt na‘n Wiehnachsgottesdeinst in de lüttsche Gautskapell in‘ Naaberdörf gahn drööft, wo de Patron de Glocke buten an‘ Boom noch süms lüert? Oder gifft dat Wiehnachen gor keene Kerken, oder blooß buten Gottesdeinste?? Ob wi us woll mit de ganze Familje, mit Omas un Opas dräpen un tauhopensitten drööft, so as süss?

Anzeige

An sick is dat bi us tau Huus Wiehnachen eegentlich jümmer desülbe Affloop, dor kann man all benah de Klock na stellen: Abends na’n Äten stickt uus Jung de Lichter an‘ Boom mit de langen Swävelsticken an. Wi späält Klavier un singt Wiehnachsleeder un packt dorna uuse Geschenke ut. Blooß lesdet Johr is allens een bäten anners lopen. Uus Dannenboom wöör nich blooß 4 Meter hoch, sonnern he har sogor glieks 2 Spitzen!! Dorför wöör he aber ok blooß half so düür! Lesdet Johr wöörn taun eersten Mal sogor de Katten mit up de Dääl, weil se an Wiehnachen nich so alleen wään schölln. De beiden döösen up’n Teppich in un snurren lies vör sick hen. Du könnst jüm kuum marken. Wi annern füngen eersmal an, naenanner an‘ Disch uuse Geschenke uttaupacken. Besonners frei sick uuse „Lüttsche“ öber dat neie Einrad. Se har vörher all euvt un suus glieks dormit üm denn Dannenboom rüm. Taun Glück wöör se nich ümkippt un in denn Wiehnachsboom rinfalln. Dat har jo wat gäben!

Blooß de Katten wöör woll mit de Tiet een bäten langwielig worn un de Duft von ehr „Geschenk“ wöör jüm in de Nääs stägen. Denn uuse Dochter har för jüm eene Packung „Gourmet-Leckerli“ kofft un de ünner denn Boom packt. Ahne dat wi dat andragen harn, wöörn de Katten jümmer „de Nääs na gahn“ un harn sick ganz lies ünner denn Boom släken. Dorbi mutt de eene Katte woll ut Verseihn mit ehren Steert tau dicht an denn Boom kamen wään. Upmal stünk dat na verbrennte Hoor, een Lichtsweif wedel ganz flink hen un her, un de Katte wöör bannig an Jauln. O nee!! Dat könn doch woll nich angahn!! Mien Kirl greep flink denn Ammer Water, de vörsichtshalber näben uusen Boom stünn, un kipp dat Water up de Katte (un up de Geschenke, de noch ünnern Boom leegen!). Dat Füer an‘ Steert güng taun Glück glieks doot, blooß de Katte schien sick wägen dat koole Water bannich verjaacht tau hebben. Se sprüng vör Schreck mit eenen Satz in denn Boom: an de Kerzen vörbi, bit na baben in de Dannnenboom-Spitze rin!! Un dor bleev se in 4 Meter Höchde sitten un keek mit groode Ogen na us rünner. Wi mössen eersmal flink de Kerzen utmaken, dormit de tweete Katte nich ok noch „Füer füng“! As wi jüst de böberste Kerze von de Leddern ut utpuust harn un vörsichtig de Katte griepen wollen, dor sprüng se upmal mit eenen Satz na de tweete Dannenboom-Spitze hen!! „Achtung, Boom fastholen!!“, bölk mien Kirl mitmal. Dörch dat Gewicht von de Katte bööch sick de Dannenboom nämlich na un na jümmer wieder na eene Siete. De eersten Kugeln güngen all daal, aber wi können em jüst noch griepen, bevör de ganze Boom up de Fliesen kipp. De Katte keum mit eenen Satz alleen wedder ünnen an, greep sick ehr „Wiehnachsgeschenk“ un suus dormit na näbenan. Denn ganzen Abend lang mössen wi nu eersmal allens mit’n Föhn dröögen, vör allen de Geschenke wöörn dörch dat „Begeeten“ von de Katte total dörchweekt. Ob wi de Katten düt Johr wedder mit up de „Wiehnachsdääl“ nähmt? Ick glööv, alleen wenn se denn Boom rüükt, gaht se von sick ut leeber ganz na buten. Mit düssen ganzen Kraam – Boom, Füer, Gestank na verbrennte Hoor un ieskoolet Water – wütt se gewiss nix mehr tau daun hebben…

Gudrun Fischer-Santelmann

Genau hinschauen: Autorin Gudrun Fischer-Santelmann nutzt diese Gabe, um Alltagssituationen und besondere Augenblicke aufzugreifen und sie mit Witz, Ironie und einem Augenzwinkern zu beschreiben.

Anzeige

3 Kommentare. Hinterlasse eine Antwort

Schreibe einen Kommentar

Deine E-Mail-Adresse wird nicht veröffentlicht.

Bitte füllen Sie dieses Feld aus
Bitte füllen Sie dieses Feld aus
Bitte gib eine gültige E-Mail-Adresse ein.

Menü